kumpulan carito randai minang

[ce_scorpi88]

 bismillah hirrohmanirrohim

scorpi gadih minang nan gadang di rantau
walopun baitu,scorpi bangga jadi urang minang

tapi sangat disayangkan
kini banyak urang minang nan indak tantu jo adaik dan budayo minang
untuk itu scorpi buek thread iko supayo dunsanak yang ado dirantau tau jo carito minang pado maso dahulunyo yang kamudian dipopulerkan dalam bantuak randai

kini scorpi tergabung dalam anggota randai yang namonyo PEMUDA KACANG SAIYO
untuk memperkenalkan budaya minang yang hampia indak dikenel lai oleh masyarakat minang yang ado di rantau

nahh............. iko carito randai yang scorpi baokkan basamo anggota randai lain nyao

Randai
Saba nan aluih

Berdasarkan berita(kaba) yang asli dan disusun kembali
oleh: Wisran Hadi

dipopulerkan oleh
grup Randai Kacang Saiyo

pelakon:
1. SABAI NAN ALUH
2. SADUN SARIBAI (Ibunda Sabai Nan Aluih)
3. RAJO BABANDIANG (Ayahanda SabaiNan Aluih)
4.MANGKUTAK ALAM (Adak laki-laki Sabai Nan Aluih)
5.RAJO NAN PANJANG
6.DATUAK KALEK (Utusan Rajo Nan Panjang)
7. PANDEKA 1 (Anak buah Rajo Nan Panjnag)
8. PANDEKA 2 (Anak buah Rajo Nan Panjnag)
9. PANYABIKRUMPUIK


RANDAI 1
 
PEMBUKAAN:

Mulo bismillah kayo disusun
Kami mauling curito lamo
Niaik tahandok lah batahun
Kini dikambang nak nya nyato
Kabalah lamo dimainkan
Adaik lamo pusako tuo
Kok nyo sumbang tolong dimaafkan
Maklumlah kami rang mudo-mudo
Sarumpun jirek dihalan
Samo rang rambah kaduonyo
Baik nan pandai jo nan bukan
Samo disambah kasadonyo

 *diiringi dendang jo saluang*

Tasabuik kaba maso dahulu
Kaba banamo SabaiNan Aluih
Curito  urang sagalo koto
Dendang urang sagalo kampuang

Adopun samaso nan bak kian
Iyo diranah padang tarok
Banamo Tuanku Rajo Babandiang
Ayah dek upiak Asabai Nan Aluih
Bapak dek buyuang Mangkutak Alam
Junjungan dek aciek Sadun Saribai
Tantangan diri Sabai Nan Aluih
Lah gadih gadang nyo tu kin

Manjad bungo dalam kampuang
Acing-acang dalam nagari
Limpapeh rumah nan gadang
Pamenan mato patang hari

Paubek jariah palara damam
Balam tongga jajran bundo
Pautan hat rang mudo-mudo
Tasabuik dir Rajo Nan Panjang

Manjadi rajo di Payokumbuah
Urang sati kiramaik aduik
Taniak mampasuntiang diri sabai
Arok kapusako jo taranak

Bak udang dibaliiak batu
Tantangan Rajo babandiang
Duo jo Rajo Nan Panjang
Sajak barumue sapuluah tahun

Sampai manjadi bujang matah
Di sinan baru inyo bacarai
Tasuruah Datuak Kalek maso tu
Maantakan sirah jo carano
Sarato pnang salangkoknyo
Untuak paminag Sabai Nan Aluih

RANDAI 2

DATAK KALEK
(tagak mambao siriah jo carano)
Manolah Tuanku Rajo Babandiang
(Rajo Babandiang tagak)

Dena banamo Datuak Kalek
Ampunkan denia dek Tuanku
Bukan kinari kinari sajo
Kinari Nak rang kacang
Bukan denai kamari sajo
Gadang mukasuik nan kadijalang
Kabakeh diri badan tuan

RAJO BABANDIANG
Datuak kalek jannyo denai
Dari labana taruih ka bireh
Basimpang jalan tangah padang
Tarangkan bana jaleh-jaleh
Apo mukasuik nan kadijalang
Buliah sanang dalam hati
Sajuak didalam kiiro-kiro

DATUAK KALEK
Mangkonyo denai dating kamari
Denai disuruah rajo Nan Panjang
Mambaok srah jo carano
Sarato pinang salangkoknyo
Untuak mamnang SabaiNan Aluih
Dek inyo indak mamak lai
Pado tuanku rundiang salasai

RAJO BABANDIANG
Kalau baitu kato datuak
Manunggu datuak molah dulu
Kato surang denai bulati
Kato basamo denai paiyokan
Dipaiokan ka mandeh dek si Sabai

DATAUK KALEK
Asai lai dapek kain putiah
Bialah labah pangguntingan
Asa kandak lai kabuliah
Lamo jo lambek denai nantikan


RANDAI 3

Adok kadiri Rajo babandang
Paik alun baliahan
Manih nan alun diluluanyo
Batangguah inyo nak barundiang

Bulek aie dek pambuluah
Bulek kato dek mupakaik
Mupakaik jo Sadun Saribai
Nan manjadi mandeh dek s Sabai


RAJO BABANDANG
Manolah adiak Sadun Saribai
Mande dek diri Sabai nan aluh
Ado tapkie dek badan diri denai
Iyo tantangan sabai nan aluih

Lah gadih gadang nyo tu kini
Lah jombang pulo tampak di urang
Kawannyo nan samo gadang
Lah baranak kasadonyo
Kok kito carikan pulo junjungannyo
Baa pandapek adiak tantang itu

SADUN SARIBAI
Lai kok ado junjungannyo
Nan tampak dek tuanku
Katokan malah pado denai

RAJO BABANDIANG
Kok nan tampak iyo lah Rajo nan Panjang
Nan manjad rajo di payokumbuah
Urabg kayo sati pulo
Datuak kalek lah dating
Mambao siriah salangkoknyo

SADUN SARIBAI
Rajo Nan Panjang kato tuanku?

RAJO BABANDIANG
Iyo, kawan salapiak sakatiduran
Katiko kami ketek-ketek

SADUN SARIBAI
Tantangan rajo Nan Panjang
Inyo barajo dihatinyo
Inyo basutan dimatonyo
Bininyo banyak bukan surang
Tiok kelok tiok baranak!

Kini anak kito pulo dipinangnyo
Nan samo gadang jo cucunyo?

Bialah denai tak baminantu Rajo
Bialah denai tak baminantu kayo
Bialah minantu denai tak babanso
Kana di den rang gaek taruang asam
RAJO BABANDIANG
Jiko baitu kato adiak
Denai lah maklum tantangan itu

SADUN SARIBAI
Katokan malah ka Datauk Kalek
Baso kandaknyo indak dibari
Elok-elok tuan barundiang
Pandai-pandai tuan bakato
Usah tasingguang hati urang

RAJO BABANDIANG
Simpan rasio elok-elok
Kok tau urang dikampuang
Awak ko dikatokan urang pamiliah

SADUN SARIBAI
Pitaruah tuan ambo pacik arek-arek
Alah kasanang tu dek tuanku


RANDAI 4

Kato putuih rundiang salasai
Putuih tak dapek di sambuang lai
Bulek hatinyo Sadun Saribai
Manulak pinangan ka diri Sabai

Dek mananti lamo jo lambek
Tibo garak ka Datuak Kalek
Kandak nan indak ka dibari
Inyolah cameh dalam hati

RAJO BABANDIANG
Manolah Datuak Kalek jannyo denai
(Datuak Kalek tagak)
Anak urang kabun tmbakau
Nak lalu ka panyalaian
Lai mah datuak nan mancakau
Manga nak jo umpan nan sasuai

Nak duo pantun sairiang
Danga kan malah dek datuak ciek lai

Anak urang tanah putiah
Nak lalu ka padang tangah
Bukannyo denai urang pamiliah
Manga dek iindak mambao gatah

DATUAK KALEK
Anak urang di padang tangah
Nak lalu ka tangjuang masam
Denai nan indak mambao gatah
Denai tembak sajo jo sumpitan

RAJO BABANDIANG
Anak urang di Paninggahan
Nak pai ka tanjuang balik
Datuak manembak jo sumpitan
Buruang mambubuang kateh langik

DATUAK KALEK
Anak urang di tanjuang balk
Nak pa ka tanjuang masam
Buruang mambubuang kateh langik
Denai malapeh asok itam
Di sinan buruang dapek dek denai

RAJO BABANDIANG
Anak urang di lereng bukik
Nak lalu ka sawah jambu
Datuak malapeh jalo sisik
Buruang manyuruak ka guo batu

Di sinan buruang makonyo ilang
Baba ka aka Datuak lai

DATUAK KALEK
Anak urang di sawah jambu
Nak  lalu ka paniang-paniang
Buruang manyuruak ka guo batu
Denai manubo sampai paniang 
Di sinan buruak dapek dek denai
Den tangkok den bao pulang
Eten ka rumah Rajo Nan Panjang
Baru nyo sanang hati denai 

RAJO BABANDIANG 
Manolah datuak jannyo denai
Usahlah kito tingkah batingkah
Kok nan pintak dari datuak
Iyo tak dapek musim baganti 
Tantangan diri Sabai Nan Aluih
Inyo nan ketek mudo matah
Umuenyo balun satahun jaguang
Darah nan balun satampuak pinang

Kini baitu malah dek datuak
Babaliak malah datuak pulang
Sampaikan pado Rajo Nan Panjang
Baso kandaknyo indak dibari 

DATUAK KALEK
Kalau baitu kato tuanku
Indak sanang di dalam hati
Indak sajuak di kiro-kiro
Kini baitu malah dek tuanku 

Tamui malah Rajo Nan Panjang
Eten d ladang pataunan
Di sikaduduak pilin tigo
Di sinan gantiang nak nyo putuih
Di sinan biang nak nyo tabuak  R

AJO BABANDIANG K
urang laweh tapak tangan
Jo niru denai tampuangkan
Bia rampuik di balah tujuah
Denai tak takuik jo Rajo Nan Panjang 

DATUAK KALEK
Ampunlah denai dek tuanku
Usah denai bari ba utang
Dari dunia sampai akhirat
Kini baitu malah dek tuanku
Lapehlah denai nan jo do’a
Buliah salamaik babaliak pulang


RANDAI 5

Alah bajalan Datuak Kalek
Iyo ka ranah Limo Puluah
Inyo bajalan bagulambek
Kalam nan indah bapanyuluah

Di tampuah jalan nan panjang
Langkah salangkah cameh cadapo
Takana kato Rajo Nan Panjang
Inyo tagamang di pintu koto

Kaba baraliah hanyo lai
Sungguah baraliah sinan juo
Adok ka diri Rajo Nan Panjang
Rajo kuaso di payokumbuah

DATUAK KALEK
Manolah tuanku Rajo Nan Panjang
Nan disuruah denai lah pai
Iyo ka ranah Padang Tarok
Ka rumah Rajo Babandiang
Mambao siriah jo carano
Sarato pinang salangkoknyo

Tapi baalah mangatokan nyo
Nan adaik lah denai isi
Limbago lah denaii tuang
Tantangan pintak dari kito
Indak nyo bari dek Rajo Babandiang
Pulang maklum pado tuan

RAJO NAN PANJANG
(TARABO)
Indak ko nyo ndak tau jo diri denai
Iko nyo nan banamo Rajo NanPanjang
Nan kuaso di Payokumbuah
Pantang kandak indak ka daprk

Nan sakarang kini nangko
Jampuik pandeka nan baduo
Japuik tabao kini-kini
Usah datuak batangguah juo

Barangkek!!!

RANDAI 6

PANDEKA I
Ampun dena dek tuanku
Ampun baribu kal ampun

Mandanga imbau dari tuanku
Tasirok darah didado
Gumanta sabatang tubuah
Lunak sagalo pasandian
Taroroh sampai ka lutuik

RAJO NAN PANJANG
Usah kalian ba olok-olok

Mangkonyo pandeka denai imbau
Denai kamanamui Rajo Babandiang
Eten d ladang pataunan
Di sawah nan ketek-ketek
Di si ka duduak bapilin tigo

Kok tumbuah silang jo salisiah
Kalian molah nan manolongkan

PANDEKA II
Kok baitu kato tuanku
Kam alah maklum tantang itu
Iyo bak kato urang juo

Kok jariah tantangan buliah
Payah tantangan labo
Pulang maklum pado tuanku

RAJO NAN PANJANG
Alun takilek lah bakalam tu mah pandeka

RANDAI 7

Kaba baraliah hanyo laii
Sungguah baraliah sinan juo
Tantangan diri Rajo Babandiang
Pa manamui Rajo Nan Panjang

Dijapuk molah Mangkutak Alam
Anak kasayangan dek ayahnyo
Di imbau pulo Sabai Nan Aluih
Buah hati limpo bakuruang

MANKUTAK ALAM
Manolah ayah jannyo denai
Lik lah dek ayah layang-layang denai
Ikua nyo panjang jelo bajelo
Barakek karateh talua
Badanguang-danguang di kapalo
Bapantang kalah di galanggang

Kini baitu molah dek ayah
Bari izin denai pai bamain

RAJO BABANDIANG
Anak kanduang Mangkutak Alam
Kok balayang-layang anak sabuik
Labiah dari itu ayah bari

Namun samantangpun baitu
Jagolah diri elok-elok
Pandai-panda bagaua samo gadang
Lawan nan usah anak cari
Basuo pantang di ilak kan

MANGKUTAK ALAM
Kalau baitu kato ayah
Lah sanang di dalam hati
Sajuak di dalam kiro-kiro

RAJO BABANDIANG
Anak kanduang Sabai Nan Aluih
Manga anak mangko bamanuang
Adokoh anak sakik jo damam
Kok sakik ayah carikan ubek
Kok damam ayah carikan tawa

SABAI NAN ALUIH
Mangkonyo Sabai dek bamanuang
Sabai bamimpi malam tadi
Ayam kinantan raso lah mati
Kabau gadang raso lah ilang
Junjungan siriah raso lah rabah
Lumbuang padi raso tabaka



RAJO BABANDIANG
Usah anak barusuah hati
Bukan mimp buruak tu nak kanduang
Rasian elok tu mah kironyo
Dangakan dek anak ayah tarangkan

Ayam kinantan raso lah mati
Tando Mangkutak di pnang urang

Kabau gadang raso lah hilang
Tando taranak nan kamanjadi

Junjuangan siriah raso lah rabah
Tando karakok ka manjadi

Lumbuang padi raso tabaka
Tandonyo padi ka manjadi

SABAI NAN ALUIH
Aie manyuruak kato Sabai
Bakelok juo kato ayah
Mimpi buruak kato Sabai
Elok jou kato ayah

RAJO BABANDIANG
Anak kanduang Sabai Nan Aluih
Ayah nak bajalan pai kapakan
Pakan nyo rami kato urang
Bari izin ayah dek anak
Lapehlah ayah pai bajalal
Mambali siriah jo timbakau

SABAI NAN ALUIH
Saba tarah indak ta tarah
Bak manarah batang sampia
Diipapek juo indak nan jadi
Sabai tagah indak tatagah
Bak managah aie hilia
Sabai lapeh jo ibo hati

RAJO BABABNDIANG
Sabalun ayah pai bajalan
Elok dangakan pasan ayah

Awak iduik bakato-kato
Kato tabagi ampek pakaro
Partamo kato nan mandaki
Kaduo kato nan mandata
Katigo kato nan manurun
Kaampek kato nan malereang

Tantangan katonan mandaki
Bakato pado nan tuo-tuo

Tantangan kato nan mandata
Bakato ka kawan samo gadang

Tantangan kato nan manurun
Bakato kapado anak-anak

Tantangan kato nan malereang
Tahu jo ereng jo gendeang

Kok tabagi kato ampek pakaro
Sipaik anak gadih tabagi ampek pulo
Partamo gadih layang-layang
Kaduo gadih langau iaju
Katigo gadh ayam kinantan
Ka ampek gadh bapusako

Tantangan gadih layang-layang
Lah lareh candomyo angin
Bara lenggok nan jo goyang
Banang habih indak dikana
Usah dipakai spaik nantun
Gadih clako tu namonyo

Tantangan gadih langau ijai
Mandanguang ka ilia
Mandanguang ka mudiak
Ka iliia tak tantu kad japuik
Ka mudiak tak tantu ka di bao
Usah dipakai spaik nantun
Gadih clako tu namonyo

Tantangan gadih ayam kinantan
Lah siang candonyo hari
Lah tabukak pintu kandang
Lalu malompek inyo kalua
Kukuak darai badarai
Musang kamanagkok indak tau
Usah dipakai spaik nantu
Tantangan gadih bapusako
Karajo manyulam jo manjahik
Dam di ateh anjuang
Kamudiak saimbauan ayah
Ka lie saimbauan mandeh
Kamudiak tantu ka dijapuik
Ka ilie tantu ka di bao
Itulah sipaik nan ka anak pakai

Kok nyampang ayah indak pulang
Carilah ayah ka payakumbauh
Mintaklah karih dari mandeh
Karih pusako jo badia balansa
Karih sati kiramaik pulo
Jajak ditikam mati juo

SABAI NAN ALUIH
Kalau baitu kato ayah
Sagalo pasan jo umanaik
Indak ka Sabai lupokan

RAJO BABANDIANG
Tinggalah anak di nan sanang
Ayah bajalan hanyo lai






bersambung

*insyaallah sacapeknyo scorpi sambuang



Posting Digabung: 17 Oktober 2009, 13:12:42

oiyo
scorpi berperan sebagai SADUN SARIBAI mandeh dari sabai nan aluih

[ce_scorpi88]

Bagi dunsanak berdomisili di pekanbaru dan ingin meramaikan aleknyo jo randai,,bisa PM scorpi

[akhwat_biologi]

rajin bana scorpi ko hee lanjuik lah carito randai nyo lai

[ce_scorpi88]

@uni abiol

Aman tu ni,cuma jari2 tangan sadang latiah habiz mangetik tugas kulh,,
insy4JJI scapek nyo scorpi lanjuik crito randai ko

[deafitri_aug04]

scorpi salasai mangatik langsuang lah ke salon buek rebonding tuh jari2nyo ...

Indak banyak tau carito2 minang do ...
Dan indak sadoalahnyo ngarati bahasonyo hehehe


Lanjuik seeh wak sambi baraja bahaso pulo hehehe

[zoozoo]

lanjutkan skorpi...mantaaaabbbbs 

[ce_scorpi88]

RANDAI 8

Alah bajalan Rajo Babandiang
Manamui Rajo Nan Panjang
Iyo diladang pataunan
Di sikaduduak bapilin tigo

Dek karuah sajak dari hulu
Busuak nan sajak dari pangka
Kawanlah barubah manjadi lawan
Sawah nan indak ba pamatang

Sadang lah bunta bayang-bayang
Sadang langang urang dikampuang
Ladang pahaunan jadi galanggang
Rajo Babandiang jo Rajo Nan Panjang

RAJO NAN PANJANG
Bareh sipuluik dalam kuali
Usah dilatak dalam lalang
Ganjue suruik tuan umbali
Kalo indak nyao malayang

RAJO BABANDIANG
Manolah tuanku jannyo denai
Usah hati taburu bana
Eloklah kito duduak dahulu
Ganti marokok agak sabatang

RAJO NAN PANJANG
Manolah tuanku Rajo Babandiang
Tantangan pintak dari denai
Manga ditulak mantah-mantah
Malu denai ka urang banyak
Malu kamano denai suruakkan

Kini baitu molah dek tuanku
Elok sarahkan Sabai pado denai
Pado menyasa kamudian

RAJO BABANDIANG
Indak ko nyo tau di diri tuanku
Awak lah gaek anak urang pulo kadipinang



RAJO NAN PANJANG
Iyo sabana kareh hati tuanku
Lai ko lamak juo buah jirami
Indak ko ibo jo bini rancak ka manjadi rando
Anak nan indak ka bapak lai
Elok barikan Sabai pado denai

RAJO BABANDIANG
Langkahkan maik den dulu
Baru nyo dapek Sabai Nan aluih

RAJO NAN PANJANG
Pucuak dicinto ulam tibo
Sumue di kali aie datang
Denai lah taniaik nan bak kian
Arak lah langkah dek tuanku
Nak denai iriangkan dari siko

SABALUN MULAI BACAKAK RAJO BABANDIANG JO RAJO NAN PANJANG INYO BASALAM LABIAH DULU.SUDAH TU MULAI BASILEK.RAJO NAN PANJANG KELAWAHAN

RAJO NAN PANJANG
E, tagak juo baru lai
Tolong waden capek
Patigokan..capeklah

KAMUDIAN, PANDEKA I JO PANDEKA II IKUIK BASILEK MALAWAN RAJO BABADIANG. RAJO NAN PANJANG MENGERANG KESAKITAN. KEMUDIAN BERDIRI LAGI. IKUIK MANGAROYOK RAJO BABABNDIANG.TAJADI SILEK CIEK LAWAN TIGO.
KASUDAHNYO
TATIKAM RAJO BABANDIANG DAN MENINGGAL

RANDAI 9

Alah lah mati Rajo babandiang
Di bunuah Rajo Nan Panjang
Dipatigokan dek rang pandeka
Lawan nan indak saimbangan

Baraliah kaba hanyo lai
Aliah ka diri Sabai Nan Aluih
Hati nan indak kunjuang sanang
Ayah dinanti di ateh anjuang

Adok ka diri panyabik rumpuik
Batamu maik Rajo Babandiang
Tabujue di lading pahaunan
Panyabik cameh dek takajuik

PANYABIK RUMPUIK
Aciak denai Sabai Nan Aluih
Katiko denai sadang manyabik rumpuik
Tampaklah urang sadang bacakak

Denai maliek dari jauah
Ruponyo ayah aciak
Dipatigokan dek rang pandeka
Yo di sawah ketek-ketek

SABAI NAN ALUIH
Ondeh buyung panyabik rumpuik
Cubo ulang sakali lai

PANYABIK RMPUIK
Usah diulang duo kali
Maramang bulu kuduak ko dibueknyo
Ayah aciak tabujua jadi maik

SABAI NAN ALUIH
Aie manyuruak kato sabai
Bakelok juo janyo ayah
Mimpi buruak kato sabai
Elok juo kato ayah
Iko malah nan tajadi


bersambung

[ce_scorpi88]

SABAI NAN ALUIH

(RATOK)

Simantuang diparik putuih
Jarajak ditanah taban
Kamano punai ka inggok lai
Tampek bagantuang nan alah putuih

Tampek bapijak nan lah patah
Kamano sabai manggapai lai
Oi bulan tarangkan lah baa
Usah bumi darai badarai

Oi tuhan tolonglah baa
Usah kami carai bacarai
Sajak rami nagari tiku
Pariaman tadanga langgang
Sajak sabai di agiah tahu
Di sinan pangana mangkonyo hilang

RANDAI 10

Aie manih di pantai landai
Di muaro ikannyo jinak
Sabai manangih sansai jo sansai
Ta ibo karano bapak

Rumah gadang sambilan ruang
Puti duduak di ateh serambi
Alang kasakiknyo batenggang surang
Bak manantang matohari

Indak di sangko rigo-rigo
Pipik sinanduang makan padi
Indak disangko nan bak nangko
Ayah kanduang ndak pulang lai

SABAI NAN ALUIH
Mandeh kanduang jannyo denai
Ayah dibunuah Rajo Nan Panjang
Dipatigokan dek rang pandeka
Lawan nan indak saimbangan

Kini baitu molah dek mandeh
karih pusako dari ayah
Sabai nak pai manuntuik baleh
Barikan ka sabai sinapang ayah
Sinapang balansa kato urang
Sinapang kiramaik nan batinggakan

SADUN SARIBAI
Usah anak pandareh bana
Antah kok urang pai ka surau
Usah anak pancameh bana
Antah kok urang pai bagurau

Kini hari balai jannyo urang
Pakannyo rami alang kapalang
Antah di sinan ayah anak
Mambali daun jo timbakau
Usahlah anak pai bajalan
Awak nan gadih mudo mantah
Aka balun pandapek kurang
Pangaja jauah sakali

Usahlah anak pai ka sianan
Antu jo setan banyak dijalan
Elok lah kito di ateh anjuang
Ganti mangunyah nguyah siriah
Nak mandeh tolong mambuekkan

SABAI NAN ALUIH
Sabai tak takuik antu jo setan
Lurah lah raso Sabai turuni
Bukik lah raso ka Sabai daki
Manuntuik baleh ayah kanduang

RANDAI 11

SABAI NAN ALUIH
Oi adiak kanduang Mangkutak Alam
Ayah lah mati dibunuah urang
Dipatigokan dek rang pandeka
Mati dibunuah dek Rajo Nan Panjang
Marilah kito jalang maik ayah
Sarato manuntuk baleh inyo

MANGUTAK ALAM
Sadng mamacik karih sajo denai ndak tau
Apo lai manikamkannyo


SABAI NAN ALUIH
(tarbo)
Sabana panakuik diri waang
Elok ganti sajo pakaian waang
Tuka jo kain kodek den

Gantikan karajo den dek waang
Batanak jo manggulai
Manjapuik aie mangapiang kayu
Buliah nak denai pai baparang

MANGKUTAK ALAM
Bukannyo denai takuik mandi
Denai nan takuik basah-basah
Mandi ka lubuak mandalian

Bukannyo denai takuik mati
Denai nan takuik patah-patah
Badan nan sadang batunangan

Namun samantangpun baitu
Marilah kito pai kasinan
Daulu malah aciak salangkah
Denai mairiangkan jauah-jauah

RANDAI 12

Alah bajalan Sabai Nan Aluih
Karih jo badia di ganggamannyo
Nak batamu jo Rajo Nan Panjang
Manuntuik baleh ayahnyo

Dek lamo lambek di jalan
Lah di tampuah korong jo kampuang
Inyo batamu jo Rajo Nan Panjang
Di siko utang di salasaikan

Tantangan Rajo Nan Panjang
Mancaliak Sabai dari jauah
Hatinyo gadang pangana ilang
Cinto bak raso ka mambunuah

RAJO NAN PANJANG
Adiak kanduang Sabai Nan Aluih
Lah panek denai dek mancari
Disiko molah kito batamu
Molah kito karumah gadang

SABAI NAN ALUIH
Manolah tuanku jannyo denai
Lah panek pulo denai mancari
Iyo disiko kito bsuo

RAJO NAN PANJANG
Luruihlah jaln ka Bukik Putiah
Jalnnyo urang ka malako
Kasiah ka adiak indak ka putuih
Ka denai arok salamonyo

Nak duo pantun sairiang
Dangakan malah dek adiak ciek lai
Ayam kuriak lambaian taduang
Akue manjelo masuak padi
Ambiak tampuruang bari makan
Dalam daerah limo kaum
Adiak surang nan tampek hati
Nan lain buliah denai haramkan

SABAI NAN ALUIH
Usah disabik padi salibu
Kok di sabik luko lah kaki
Denai maliek dalam saribu
Tuan surang nan tampek hati

Namun samantangpun baitu
Tuan nan pandai bamanih muluik
Pandai manggunting dalam lipatan
Pandai manuhuak kawan sairiang
Urang surang dipatigokan
Sampai tabunuah ayah denai

RAJO NAN PANJANG
Bukan denai mambunuah ayah adiak
Inyo lah sampai diajanyo
Kok mati bana ayah adiak
Rajo Nan Panjang kan lai ka gantinyo

SABAI NAN ALUIH
Adaik di dunia baleh mambaleh
Utang nyawo baie jo nyawo
Utang ameh baia jo ameh
Utang budi baie jo budi
RAJO NAN PANJANG
Bana baitu kato adiak
Tapi samantangpun baitu
Kau nak gadih mudo mantah
Urang kiramaik banyak didunie

SABAI NAN ALUIH
Samantang denai parampuan
Samantang denai batulang lamah
Tak takuik denai iduik ka mati
Nantikan dek kau kapakirim nangko

RAJO NAN PANJANG MANEMBAK KA ARAH SABAI..SABAI MAILAK..SABAI NDAK KANAI. RAJO NAN PANJANG TACANGANG

SABAI NAN ALUIH
Pandai bana tuan manembak
Luruih bak marantang tali
Lah kanai cincin dijari manih
Cincin putuihjari ndak luko
Cincin sambilan putuih ciek

Nan ampek tingga di ateh
Nan ampek jatuah ka bawah
Putuih jo apo ka denai uleh
Oi, urang sati janyo urang
Kok dibunuah sabai ka mati
Tuan kok juo nan kahilangan
Usah lah tuanku pambangih bana
Eloklah kito ka rumah gadang

RAJO NAN PANJANG
Jiko baitu kato adiak
Sanang didalam parantian
Sajuak didalam kiro-kiro
Mplah kito bajalan lai

SABAI NAN ALUIH
(mambidiak rajo nan panjang)
oi, Rajo Nan Panjang
Si geneang anak rang padang
Babaju kasumbo aluih
Jantan nan gendeang tangah padang
Tahanlah tembak Sabai nan Aluih

SABAI MANEMBAK. RAJO NAN PANJANG KENA DAN LANGSUNG MATI


Posting Digabung: 03 November 2009, 12:47:29

bilo2 scorpi posting carito randai yang baru

kini ko kritiang jari scorpi
dibonding lu

baru bisa posting carito baru